عديتهم ـ ريم منضر
عدّيتهم الأحزان وحدي
مرّة وراء مرّة
محاين وحمول وعذاب ما مرّه
طلع مش ديمة تلقى خيط
كلّ ما تحلّ الصّرة.
عدّيتهم
عدّيتهم وحدي أيّام وليالي
ومتكدّرة جمعة وراء جمعة
لا من طلّ لا من سأل
نسيت طعم الجَمْعة
بكيت ودعيت
وقت الآذان في الصّمعة.
عدّيتهم
وكليتهم كفّ وراء كفّ
الدّنيا فرحت بيّا
الكدر ما يستنّى
يجي لفّ لفّ
تعجبه القعدة عنّا
هو والآهات اللّي معاه جات
في الصّدر شادّة الصف
يا عالي ذبنا...تعبنا...تبنا
امتى هالحمل علينا يخفّ.
عدّيتهم
ونسيتهم كلّ اللّي غدروا
ورحلوا بعد ما خانوا
لا بوعد وفوا ولا حتّى العهد صانوا
مِحِيتهم كا يِنّهم بيوم ما كانوا
عااااادي...
مثل ما احنا هونّا هوما زادة هانوا.
عدّيتهم
غصرة وراء غصرة
كتمت آهاتي ومسحت دمعاتي
وِقْويت بعد كلّ كسرة وكسرة
قطعوا الأرحام...دوّارة الأيّام
عالماضي اللّي كان بينا
عمري ما نقول يا حسرة
كسروا القلوب... وزادت لهم العيوب
عالذّنب...حد ما ناوي يتوب
باعوا الدّم وبادروا بالهم
وهانت عليهم العشرة
عااادي...
مادام حطّوا مكان القلب صخرة
وعد و ينتمّ
تحمّل يا قلب...اسكت يا فم.
بقلمي: ريم منصّر
اضف تعليقاً عبر:
الابتسامات