كان جنون ـ أيمن بلال
.... كان جنون ....
وتعدي السنين بجنون
ولسة قلبي ف أفلاطون
وميامي تشهد علي حبنا
كان كل شئ فيه مجنون
من سيدي جابر أطل ألقاكي
يبدأ زماني بضحكة عينيكي
وبلمسة إيدين أنا قلبي ليكي
وياخدنا الهوي لعالم كله جنون
جميلة حبيبتي والشط عرشها
كل شئ فيه جميل من حسنها
طفلة ف هواها والحسن طبعها
وغيرتها صعبة مليانة بالظنون
أخرج م البحر تلفني بإيديها
كأني طفل أماني ف عينيها
تعالي حبيبي يجري قلبي عليها
تطل الناس تقول بأهواه بجنون
كأن الشط مخلوق بس لنا
ولا نحس بالناس إللي هنا
أنتي حبيبي معايا وبس أنا
معاك في حضنك مهما يكون
ياشط الذكريات ياسنين عمرنا
إزاي بعدنا وإحنا كنا لبعضنا
حبيبين هنا ولا حد كان زينا
عشنا وقلنا لأخر الزمن هنكون
فين إنتي وفين أنا بعد السنين
مفضلش غير شوق ويا حنين
تاه زماننا وبقي مكاننا ليه حزين
وباقي ضحكة لما نسمع أفلاطون
.... أيمن بلال......
اضف تعليقاً عبر:
الابتسامات