وعد الأمان - حورية جمال

 وعد الأمان

توعدني ..

تبقي في البرد دفايا

تبقي في الشدة معايا

تبقي أول حد يسأل

لو غشيت عتمة سمايا

توعدني تطمن قلبي ..

وقت الخوف تبقي حمايتي

توعدني تسوق في دربي ..

حب صافي ونور هدايتي

توعدني تكونلي غنوة ..

تختصر أجمل حكايتي

توعدني ..

تبقي حدوتتي وحكايتي

ناسي وحبيبي ومرايتي

تبقي أهلي ودنيتي ..

تبقي ابني وصاحبي

وقت حزني تكونلي فرحه

وقت ما ازعل ضحكتي

تبقي كلماتي وسكاتي

تبقي بكره وذكرياتي

لو تعبت تطمني ..

تسمعني ..

تعشقني ..

تملكني بنظره واحده ..

تخطفني واحدة واحدة ..

وبعيونك تحضني

توعدني ..

تبقي في الغربة بلادي

تبقي قمري ليل عنادي

تبقي نوري في العتمة دايماً

صوت أمان بيصحي وادي

توعدني ..

لو قست الأيام عليا

تشتري بالكون عنيا

تمسح الدمعة بإيديك

تنسى كل الدنيا فيا

لو ناديتك تبقي جاري

تبقي سري وكل داري

تبقي ضهري وسندي دايماً

وقت ضعفي وانكساري

تنسى ويايا الأسامي

وتحتوي خوفي وكلامي

وتبقي مرسايا وأماني

وتشفي بوجودك آلامي

توعدني ..

تبقي كل الأمكنه

مستحيله وممكنه

تبقي فرحه متنتهيش

لو يعدي

 100 سنه

توعدني ..

تبقي موجود هنا

بقلمي / حورية جمال